مخلل مشكل ( خيار وفليفلة و جزر )
وفيكي تحطي اي نوع من خضار بتحبيه
المخلل المشكل لون و طعمة وشكل وقرشة بتجنن بتاخدك للنجوم و الصورة لوحدا بتحكي اديه هالمخلل ناجح ولونها بيشهي واي ست بيت بتقدر تعمله لانه طريقتها سهلة وبسيطة وحاولت اعير المقادير بالاكواب ومستحيل تفشل مع اي ست بتمنى تنال اعجابكم يا حبايبي
الطريقة بالتفصيل
1-اهم شي بتحضير المخلل انه نختار الخضار تكون طازجة و فريش و قاسية مثلا الخيار الافضل يكون خيار عضوي او الخيار البلدي و نختار الخيار اللي حجمه صغير و يكون قاسي وصغير ورفيع و الفليفلة الافضل نختار اللي حجمها ايضا صغير وقشرتها ما تكون سميكة وبسوريا في فليفلة مخصصة للمخللات بتطلع كتيير طيبة بس هون بالغربة غير متوفر هالنوع من الفليفلة اللي اسمها حسكوري لهيك فينا نستعمل اي نوع فليفلة متوفر عندك
2-بواسطة عود خشب رفيع اي عود الاسنان نعمل 3 ثقوب بكل حبة خيار او ممكن بواسطة راس سكين رفيع تعمل شق ببطن كل حبة خيار
3-هون اخترت الخيار البلدي العضوي وعملت بكل حبة خيار 3 ثقوب او فيكي تعملي ببطن كل حبة خيار شق صغير بواسطة راس سكين رفيع بس انا بغضل اعمل ثقوب باستعمال عود خشبي رفيع
4-طبعا اكييد بتعرفو اهم شي الخضار نغسلها جيدا ونضعها بمصفى ونتركها تنشف تماما قبل و الفليفلة تخلصت من العود و بواسطة سكين عملت شق رفيع براس كل حبة فليفلة كما موضحة بالصورة
5-الجزر قشرته و قطعتها ل حلقات متوسطة السماكة وطبعا فيكي تستعملي اي نوع خضار لعمل مخلل متل ملفوف و الزهرة والفاصوليا و اللوز الاخضر ( عقابية ) والجانورك الاخضر و اللف والبندورة الخضرا والخس ووو
6-الافضل نستتعمل مراطبين من الزجاج لكبس المخلل واذا عندك مرطبان الضغط بيكون افضل واذا مو متوفر استعملي اي مرطبان عادي بس يفضل يكون زجاجي و نصف فيها الخضار بشكل متناسق ومرتب وانا عملت مرطبانين واحد مخلل مشكل فيو جزر وخيار وفليفلة والتاني بس خيار ورتبت الخضار بالمراطبين بشكل متناسق
7-لازم ما تعبي وتملي المرطبان للاخير وتتركي حولي 3 او 4 سم فارغ لحتى لما نسكب عليها ماء التخليل تغمرا للخضرة وما تفور اثناء فترة التخليل وانا بوزع فصوص من الثوم المقشر بين الخضار بكل مرطبان
8-وزعت فصوص ثوم بكل مرطبان و فيكي توزعي بكل مرطبان حبوب كزبرة صحيحة بيعطيا كتيير نكهة طيبة للمخلل ( بس انا هالمرة ما حطيت لانه ما كان عندي متوفر حبوب الكزبرة الصحيحة) وفيكي تحطي على سطح كل مرطبان بضع اوراق نعناع اخضر ( انا هون ما حطيت ) والبعض بيحطو بهارات ناعمة ( متل فليفلة حمرا بودرة و كزبرة بودرة لكل مرطبان بس انا ما بفضل استعمل البهارات الناعمة لانه بشوف انه لون ماء التخليل بيتغير وبياثر على لون المخلل )
9-بعد ما عبينا الخضرة هلء صار وقت نجهز محلول التخليل
10-الافضل نستعمل ماء معقم لعمل محلول التخليل ولهيك انا بغلي مي قبل بيوم وبغطيها وبتركها تبرد منيح
11-عيارات محلول التخليل رح اكتبلكم العيارات بالاكواب متل ما انا عملتا و بالوزن ( استعملت الاكواب العيارية او فيكي تستعملي اي كوب وتعيري فيها كافة المواد )
4 كوب ماء مغلي مبرد ( ليتر واحد ماء )
ربع كوب خل ابيض وبيصير خل عنب بس انا بفضل الخل الابيض ( 60 مل )
ربع كوب ملح خشن حصرا اي ملح صخري او ملح بحري حوالي 4 ملاعق طعام ملح ( من 50 الى 75 غرام ملح خشن ) ممنوع استعمال الملح الناعم العادي او اللي فيو اليود في عمل المخلل لانه رح يطري المخلل
ملعقة كبيرة سكر
2 ملعقة صغيرة ملح ليمون
12-ندوب كمية الملح والسكر وملح الليمون بمقدار الماء المذكور ونحركها جيدا حتى يذوب الملح والسكر وملح الليمون بشكل كلي وانا كل مرطبان من المراطبين الموجودة عملت عيار واحد من محلول التخليل ( اي 4 كوب ماء ) وبس يدوب الملح بتضيفي الخل للماء وبذلك صار عندك عيار محلول التخليل جاهز للصب بالمراطبين ( فيكي تضاعفي عيارات محلول التخليل حسب كمية الخضار اللي عندك انا عملت عيارين )
13-صبيت المخلول بالمراطبين وسكرتها بالغطا بشكل محكم
14-هلء بقلب المرطبان المقفل باحكام على تمها وهالخطوة ( اختيارية) الهدف منها لما نقلبها اذا كنتي حاطة بهارات صحيحة او فصوص توم هيك بتتوزع بشكل منيح واتركيا شي نص ساعة وبعدا رجعي المرطبان لوضعو الطبيعي ههه واتركيه بالمطبخ مدة تتراوح من 10 الى 15 يوم حسب حرارة الجو وبعد مرور هالوقت بيصير عندك اطيب مخلل
15-المخلل صار جاهز للتقديم والاكل بعد مرور 15 يوم شوفو اللون ما احلاه وبس فتحتي المرطبان يفضل وضعه بالبراد لحتى ما يطرى المخلل ( المرطبان المفتوح فقط نضعه بالبراد ) ولما بدك تطالعي مخلل من المرطبان يفضل تطالعبه بواسطة ملعقة ناشفة وانه ما يوصلو مي للمرطبان
ليست هناك تعليقات:
إرسال تعليق